“Imos certificar toda a nosa produción como ecolóxica”

En Betanzos falamos con Luís Sande, á fronte de Pagos de Brigante.

Quen e cando funda a adega?

Fundeina eu, na primavera de 2018.

Como chegaches ao mundo do viño?

Eu son xubilado da Administración Pública. Actualmente somos meu fillo, Luis Sande Lage, e mais eu os que estamos á fronte.

Lembras a túa primeira vendima?

Foi en 2020, no ano da pandemia da Covid. Nestes primeiros anos contratamos un especialista francés para que nos asesorase.

Algún recordo especial na túa vida á beira das vides e os viños?

Lembro que, curiosamente, malia ser a primeira vez e as circunstancias todas dese ano, os viños saíron fabulosos.

De que áreas concretas veñen as vosas uvas?

Das parroquias de Tiobre, Brabío e Requián, no Concello de Betanzos, e das de Quintas e Souto, no de Paderne.

Con que variedades de uva traballades?

Con oito variedades: Branca lexítima, Godello, Agudelo, Palomino fino (brancas) e Mencía, Serradelo, Garnacha tintureira e Roibal (tintas).

Que pensas que diferencia a túa adega, os teus viños, doutros?

Somos dos últimos en chegar e, ao contrario que outros compañeiros da zona, temos unha estrutura empresarial. Ademais temos posibilidades de investir e non temos présa por obter resultados, queremos facer bos viños. Tamén temos máis superficie de viñedos que o resto, polo que producimos máis viño que os demais. Os nosos coido que son viños máis afiados, con maior acidez, de carácter máis marcado. E por outra banda, coidamos tamén de maneira especial a imaxe gráfica, con etiquetas vintage deseñadas especialmente para os nosos viños.

Como foi a evolución da adega ao longo do tempo?

Estamos centrados nos últimos tempos en certificar toda a nosa produción como ecolóxica, algo que xa se dá na práctica a falta de cumprir cuns poucos trámites máis.

Onde vendedes principalmente a vosa produción?

Temos un distribuidor para a Coruña e Ourense, e en lugares como Santiago de Compostela ou Betanzos vendemos directamente en tendas especializadas ou de delicatessen. Ademais, fixemos algo de exportación a países como Dinamarca ou o Xapón.

Como ves o futuro?

Contamos que este ano haxa unha produción moi reducida por cuestións climáticas. A medio prazo estamos á agarda de que “Picha”, o viñedo histórico que estamos a recuperar teña máis produción. De feito contamos coa axuda do programa ECOSPHEREWINES da UE para a recuperación deste terreo en harmonía coa natureza; queremos que sexa algo máis que un viñedo e temos previsto plantar froiteiras, poñer colmeas e instalar pequenas cabanas nas que pasar a noite. Plantar 10 hectáreas é duro, e queremos ir con calma e facer as cousas ben.

Queres recomendarnos algunha maridaxe especial…?

Os nosos viños teñen un carácter mariño, de salinidade. É por iso que casan ben con todo tipo de peixes brancos. Pero especialmente recomendaría os nosos godellos para tomar con percebes ou, tamén, con comidas de autor ou asiáticas.