“O máis complicado foi meterlle na cabeza á xente a caste boa que temos en Betanzos”
Conversamos co betanceiro Lorenzo Bescansa, enxeñeiro agrónomo e fundador das adegas do mesmo nome.
Quen e cando funda a adega Lorenzo Bescansa?
Fúndoa eu en 1999.
Como chegaches ao mundo do viño?
Eu son enxeñeiro agrónomo. Estudei na Politécnica de Madrid, son de Santiago e casei na Coruña. Alí comecei a estudar sobre o tema e vin o potencial do branco lexítimo en Betanzos, a pesar das moitas reticencias que había na zona a esta uva histórica na comarca que a xente vía como allea. Pero eu seguín adiante: elaborei un plan indo parcela por parcela por Betanzos, Coirós, Paderne…; fixen unha descrición da variedade, e fun recollendo material vexetal para poder recuperar o branco lexítimo.
Lembras a túa primeira vendima?
Foi unha vendima na que fomos recollendo pouquiñas uvas de moitas parcelas: dúas caixas aquí, dúas caixas alí. Fixemos uns 200 litros. Aínda conservo algunha botella daquela… e o viño é espectacular!
Algún recordo especial na túa vida á beira das vides e os viños?
Os mellores recordos están asociados ao traballos na parcela que replantamos detrás da ponte de madeira de Betanzos.
De que áreas concretas veñen as vosas uvas? (concellos, parroquias, lugares etc)
De varios lugares nos concellos de Betanzos e de Miño: de Brabío, de Santa Uxía, de Ansimonde e tamén de Betanzos cidade.
Con que variedades de uva traballades?
Branco lexítimo, Agudelo.
Que pensas que diferencia a túa bodega, os teus viños, doutros?
Nós buscamos facelos o máis naturais posibles, usando só Branco lexítimo e Agudelo. Son viños típicos de Betanzos, con acidez. O “Lorenzo Bescansa” ten unha puntuación de 93/100 na Guía Parker, algo que poucos viños de Galicia superan.
Como foi a evolución da bodega ao longo do tempo?
O máis complicado foi meterlle na cabeza á xente a casta boa que temos en Betanzos.
Onde vendedes principalmente a vosa produción?
En Betanzos e na Coruña, pero o obxectivo agora é entrar á exportación. O “Lorenzo Bescansa Ouro Moído”, que elaboramos con brotytis (a chamada podremia nobre) vai para restaurantes con Estrella Michelín.
Como vedes o futuro? Algún reto concreto no horizonte?
Temos moitos impedimentos, cunha produción comprometida; con parcelas de difícil acceso, ás que hai que ir camiñando; con pendentes maiores que as da viticultura heroica e sen elevadores. Eu agora, con 63 anos, aspiro a conseguir estabilizar a produción. Ademais, queremos facer un espumoso polo método ancestral.
Queres recomendarnos algunha maridaxe especial dalgún dos teus viños?
O branco lexítimo, se ten gradación, vai ben tanto con carne como con peixe. O “Lorenzo Bescansa Ouro Moído”, nos restaurantes con Estrella Michelín, acompaña pratos suaves en boca como patés ou tamén queixos potentes.
